— 374 —
kamar, kendati teritoengnja ada doea, tapi sabenernja berlengket djadi sato dan di sitoe tjoema ada doea tempat tidoer jang memisaken satoe pada laen.”
Orang-orangnja memanggoet.
Liang-sih berkata poela:
„Djoega prenta kira-kira sapoeloe atawa limabelas orang bersadia sendjata, kerna kaloe marika taoe jang in malem maoe dilakoeken pembokongan dan ilmoenja soeda djadi poenah, ia tentoe aken melawan mati-matian.”
Kombali itoe orang-orang memanggoet.
Sahabisnja mamerenta, tiga orang itoe doedoek kombali aken menonggoe selesihnja barang barang jang disoeroh sadiaken dan lakoeken.
Itoe malem, maski poen siang-siang Oan Swie bersama Tjoa leng telah naek ka tempat tidoer, tapi sakean lama iaorang belon djoega bisa poeles. Tjoa leng merasa gerah, hingga terpaksa bangoen kombali.
Oan Swie jang ada mempoenjai ilmoe, waktoe Kwe Keng lagi berdami boeat loemaken ilmoenja, di itoe saat ada dapet firasat dan sigra djooga ia dapet taoe apa jang orang hendak berboeat pada dirinja.
Sigra djoega ia toeroen dari tempat tidoer dan hamperi itoe sobat jang lagi doedoek sambil mamegang kipas.
„Djagalah diri hati-hati,“ kata ia dengen soeara berbisik.
