— 371 —
orang-orang jang bisa dapet tangkep, nanti dibriken persenan besar.
„Djadi tegesnja itoe Oan Swie ada djadi kawannja satoe orang pemboeronan,” kata itoe oetoesan sabagi penoetoepnja.
Lie Liang-sih tida menjaoet, roepanja djadi sedikit poetjet, kerna merasa amat tida enak kaloe itoe orang berilmoe jang ia oendang ka roemanja, sampe ditangkep lantaran karembet pada kawannja.
Sedeng itoe pembesar merasa koerang senang, sabaliknja Kwe Keng jang dari tadi ada mendengeri, djadi amat girang dan kata, inilah ada kabetoelan sekali boeat bales ia poenja sakit hati.
„Tapi apa kaoe tida sala kenalin ?” menanja itoe oetoesan pada si pengikoet:„djangan kaoe kliroe liat ?”
„Itoelah tida bisa djadi, saoet si pengikoet: pada waktoe Pang Loya pergi ambil persakitan Lie Eng, kita-orang poen ada mengikoet di barisannja. Maka waktoe Pang Loya terboenoe oleh itoe orang-orang djahat jang merampas persakitan, kita berame poen telah liat dengen njata, hingga tida bisa djadi sala lagi.”
„Djadi tida sala bahoewa orang jang kaoe liat baroesan Tjoa leng adanja ?” demikianlah kadegeran Kwe Keng menegesin.
„Kita-orang brani ditjolok sampe boeta, kaloe apa jang kita liat itoe djadi sala," saoet si pengikoet dengen sagala kapastian. maka Siantiang
