— 71 —
pertjaja lagi dan akoe dapet moeka dari Hek-kat."
Tiada lama kandaran jang bawa Koei Hoa, Thian Hok dan Tong Kim Sioe sampe di roema hina merk Sian Siam Tjaij, ditempat mana memang Koei Hoa ada tinggal.
Koei Hoa ada tinggal di loteng ka tiga dari itoe roema, prempoean-prempoean hina jang laen bertempat sebla bawahnja, kerna dalem sebegitoe banjak tiada satoe jang bisa menangken ketjakepannja Koei Hoa, hingga itoe batauw dapet banjak oewang dan merasa sajang pada Koei Hoa melebiken dari anaknja sendiri.
Satelah sampe, Koei Hoa prenta boedjang pondong Thian Hok ka kamarnja, sedeng Kim Sioe pergi ka tempatnja si batauw dan kasi taoe siapa adanja Thian Hok, hingga si batauw djadi girang boekan alang kepalang, kerna ia taoe bahoea Thian Hok ada anaknja soedagar jang terkenal dan tentoe ada bawa banjak doeit.
Thian Hok direbaken disatoe korst males jang terales djok tipis, oleh Koei Hoa kepalanja dipakeken Eau de Cologne dan kasi tjioem disapoe tangan, kamoedian ia prenta itoe boedjang berlaloe.
Dalem itoe kamar ada dirias netjis sekali. Disamping randjang ada satoe medja tempat berias teratoer roepa-roepa aer wangi, tiada sebrapa djaoe ada terletak medja ketjil jang terletak roepa-roepa baboeahan, selaen itoe ada digantoeng
