— 167 —
terlaloe pajah boeat bisa oèroes sama sekali. Kau moesti ati-ati djaga toko Hiap Tjiang soepaja djangan djadi dapet roegi apa-apa. Akoe sabole-boleh maoe tjari taoe di mana adanja si Thian Hok, kerna maski akoe ada sanget bentji padanja, tetapi tiada baek kaloe tiada dibilangin dan soeroe ia poelang boeat ketemoeken jang pengabisan kali pada ma toea-nja, kerna ia sanget disajang.”
„Akoe menoeroet apa jang ajah kata,” kata Thian Pouw jang di itoe koetika soeda salin patean berkaboeng. „Akoe berdjandji aken perhatiken apa jang ajah pesen. Ajah djangan koeatir nanti akoe maen gila seperti engko Thian Hok.”
Sasoedanja pesen apa jang perloe, Sie An poelang lagi ka roemanja. Di itoe malem ia tiada bisa tidoer poeles sampe pagi, dimana koetika baroe sadja lontjeng mengoetaraken poekoel lima, dengen l'awah boengkoesan pakean ia pergi ka plaboean dengen teranter oleh Hek-kat, Thian Pouw, Thian Sioe bersama-sama Tong Kim Sioe. Pada laen-laen sobat andenja Liem Sie An tiada keboeroe kasi taoe, maka ini sobat ande tiada taoe kaloe ia soeda brangkat poelang.
Satelah kapal kasi tanda aken brangkat, baroelah Thian Pouw berdoea Tong Kim Sioe poelang, sedeng Hek-kat satelah kasi tanda pada kekasinja. poen laloe brangkat bersama-sama Liem Thian Sioe.
