— 118 —
Akoe bilang teroes terang pada kau, jang akoe soeda trima pandjer doea ratoes boeat sanggoepin maoe padanja. Abis kaloe kau tiada maoe, begimana akoe taro moeka kerna akoe sering dapet toeloengan dalem segala hal dari dianja?”
„Siapa soeroe maen trima sadja orang poenja pandjer?” kata Koei Hoa. „Akoe soeda bilang ada sanget bentji padanja, kendati akoe dioeroekin doeit djoega, akoe soeda tiada soedi lagi liat tjetjongornja. Doeloean koetika akoe ada sendirian didalem kamar, dengen tingka seperti bandot kera baoein batjin, ia samperin akoe, tetapi akoe soeda tinggal kaloear, maski begitoe ia masi sadja maoein padakoe. Dasar lelaki tiada taoe maloe memang soesa.”
Tjit Mah liat Koei Hoa djadi mara-mara lantes tinggalken pergi, dengen pengharepan dapet boedjoek dilaen waktoe. Sabenernja kaloe laen-laen prempoen hina jang ada disitoe brani berlakoe begitoe, siang-siang soeda makan palangan pintoe, tetapi pada Koei Hoa ia tiada brani, lantaran Koei Hoa ada djadi soember oewangnja, jang kaloe ia berlaloe dari sitoe, tentoe djadi meroegiken boekan sedikit padanja. Tjoema ia ada sakit hati pada Thian Hok, kerna sedari Thian Hok ada lengket dan sering-sering dateng. Koei Hoa tiada maoe trima tetamoe lagi sebagi biasa.
