— 117 —
soek kantong, maoe apa perdoeli? Kaloe akoe poenja pengrasaan, semingkin toea ada lebi baek lagi kau ikoetin, kerna orang toea ada sajang pada bini jang moeda, apa lagi seperti kau, tentoe apa kau maoe ia toeroetin. Ia soeda bilang pada-koe, kaloe kau maoe ikoetin padanja, ia nanti sediaken satoe roema gedong dengen bebrapa boedjang serta kreta boeat pasiar. Jang begimana lagi kau maoe tjari? Dibandingken pada Thian Hok tjoema ia menang moeda, tetapi rojalnja ada kala djaoe.”
„Akoe soeda bilang berkali-kali!” kata Koei Hoa dengen lakoe mara-mara. „Kaloe akoe diboeat bini moeda akoe tiada soedi barang sedikit. Maski Thian Hok sekarang ada bapanja tetapi ia djandji maoe piara akoe satoe sama satoe dengen baek kaloe kamoedian ia soeda djadi koeasa dari toko Hiap Tjiang. Lagi Thian Hok soenggoe orang moeda, tiada begitoe mata krandjang sebagi Tan Sam jang tjeriwis. Djangan sentara boeat didjadiken bini moeda, liat sadja tampangnja akoe tiada soedi!”
„Eh, Eh Koei Hoa, lagi-lagi kau soeka ngambek,” kata Tjit Mah dengen tjengar tjengir. „Kaloe orang denger kau poenja omongan, tentoe tiada baek, kerna Tan Sam ada orang kaja dan banjak doeitnja, kapan tempo sadja dia maoe bikin kita tjilaka lantes kedjadian lantaran oewangnja.
