293
Itoe tikar bergojang lebi kras maka dia tanja pada dirinja sendiri apa brangkali angin ampoenja lantaran maka itoe tikar bergojang, tatkala itoe dia baroe dapet taoe betoel.
Dari itoe lobang jang djadi semingkin besaar, dia meliat kaki-kaki jang beramboet dari satoe binatang jang misi ada didalem itoe lelangse dari tikar.
Dengan sigra Ming merasa goemetar pada sagenap badannnja. Di blakang itoe kaki-kaki soeda kaliatan kapala jang amat geli dari satoe lawa-lawa besaar, abis sabentar lagi dia oendjoek dirinja sama sekali di loear lelangsé itoe. Matanja itoe binatang jang 8, ada meliat pada Ming; dia bergerakkan dia poenja koemis seperti dia maoe raba apa-apa ataoe bikin penganalan tempat.
Ming maoe bangoen boeat boenoe itoe binatang. tetapi badannja terlaloe rasa brat, sebab kabanjakan isap madat.
Tempo itoe binatang soeda toeroen dari lalangsé dan berdjalan menoedjoe bangkoe dimana Ming lagi berbaring, maka Ming soeda meliat njata roepanja itoe bintang ia itoe ada satoe lawa-lawa jang asal paling besaar, dengan pake tandoek ataoe koemis jang melintang. moeloetnja lebar, badanja item dan peroetnja bergaris merah.
Maka binatang itoe di pangil lawa-lawa merah, jang djahat dan mandjoer sekali kaloe dia menggigit.
Proet binatang itoe kasi tingal aer seperti lendèr pada tempat jang di djalani olehnja. Besarnja ada kira-kira 6 dim. Dia berdjalan begitoe pelahan seperti djoega ia taoe jang rampasannja tiada bisa lari dan Ming
