85
Lantas semoea tertawa, sampe itoe nona djadi terlebi bingoeng, moekanja merah seperti orang maloe bibirnja poetjat.
Anak anak moeda itoe dateng dekatin itoe nona serta katanja: „Masoeklah, nona jang elok dan tjantik. Masoek, djangan takoet kita tida nanti makan sama nona.
Lagi lagi orang ketawa.
Ajo, nona manies, katakenlah apa nona maoe.
Apa barang kali nona maoe tjari djodo, di sini kita semoea bole di pilih, tida njang poenjain. Pilih sadja nona. jang di pilih tentoe beroentoenglah.
Ach pilih akoe, nona!
Djangan, pilih akoe, dia masih terlaloe moeda Akoe lebi baik oemoerkoe soedah doea poeloe ampat taon dan soedah taoe djadi soldadoe.
Itoe nona terlebi bingoeng, dia djadi takoet tida bisa berkata kata dia maoe keloear sadja tetapi satoe dari itoe sinjo sinjo alangin dia sampe tida bisa keloear.
Ach, toean berkatalah itoe nona dengan sedih jang tida dapet di reboet.
Moekanja djadi poetjat seperti majit ia gemeteran orang misti berkasian kaloe liat dia begitoe. Air matanja berlinang linang, ia tarik napas pandjang.
