— 353 —
Sedeng ini doea sobat soeda diadi sebagi orang kalap di podjok kamar, Mousqueton menangis.
„Ha, soeda," kata d'Artagnan, dengen begini kita tiada dapet satoe apa. Mari kita brangkat dan sebagimana akoe bilang baroesan, kita pergi peloek Raoul; brangkali ia telah trima kabar dari Athos.
„Demi kahormatan koe," kata Porthos, „itoe pikiran betoel, sobat d'Artagnan, kau selamanja bisa dapet pikiran baek. Mari kita pergi tjari Raoul“.
„Tjilaka itoe orang jang ini waktoe brani hinaken akoe poenja toean," kata Mousqueton dalem hatinja.
Iaorang naek koeda dan lantes brangkat. Di pintoe kota Saint Denis iaorang dapetken orang banjak berkoempoel. Orang kroeboetin toean de Beaufort jang baroe sampe dari Vendome dan coadjutor lagi oendjoek itoe hertog pada orang banjak.
Pendoedoek kota Parijs kira djikaloe toean de Beaufort. djadi kapala dari iaorang poenja gerakan, tentoe iaorang tiada nanti bisa dikalaken oleh moesoenja.
Ini doea sobat sengadja ambil djalanan ketjil soepaja tiada liwat deket hertog de Beaufort dan iaorang sampe di pintoe kota Saint Denis.
„Apa betoel toean de Beaufort soeda sampe di Parijs?" menanja pendjaga pintoe kota pada ini doea sobat.
„Betoel sekali," kata d'Artagnan, dan laen dari itoe toean de Beaufort soeda minta toean Vendome, ajahnja itoe hertog, dateng djoega di Parije.
