— 348 —
„Di mana kita moesti pergi?“ menanja Porthos.
„Bermoela ka Parijs,“ kata d'Artagnan, „akoe moesti oeroes doeloe bebrapa perkara.“
„Mari kita pergi ka Parijs,“ kata Porthos.
Iaorang lantes brangkat menoedjoe ka Parijs.
Sesampenja di pintoe kota iaorang djadi heran begimana dalem sedikit tempo keada'annja di sana soeda djadi beroba begitoe banjak. Ampir koeliling tempat deket pintoe kota di djaga sampe rapet dengen orang, di antara mana ada keliatan satoe kreta terbalik dan soeda pata, sedeng orang orang jang lebi doeloe ada doedoek dalem itoe kreta dengen niatan boeat lari kaloear, jaitoe saorang toea dan doea orang prempoean soeda ditahan.
Tapi koetika iaorang liat d'Artagnan dan Porthos minta idzin boeat dikasi masoek, iaorang djadi sanget girang. Iaorang anggep ini doea officier tento soeda tiada soeka bekerdja di bawa prentanja Mazarin dan iaorang maoe tjoba boedjoek marika, boeat toeroet fihak pendoedoek kota Parijs.
„Apa Radja bikin di loear?“ menanja iaorang.
— „Radja tidoer.“
— „Itoe prempoean Spanjol?“
— „Lagi mengimpi.“
— „Itoe djahanam orang Italisan?“
— „Ia djaga. Oleh kerna itoe kau orang biar ati ati, iaorang lari dari Parijs tentoe dengen ada genggem sala satoe niatan. Tapi kerna sabenernja kau orang ada banjak lebih tegoe, kau djangan ganggoe orang toea dan orang prempoean, lebi baek kau bales sakit hati pada orang orang jang bersala.“
