— 347 —
matanja ia berbangkit. Itoe orang ada Mousqueton jang lantaran keabisan roempoet soeda ambil makanan koeda boeat ia poenja pembaringan.
„Hajo, Mousqueton!“ kata d'Artagnan, „tjepet, kita moesti brangkat!“
Koetika denger soeara sobatnja dari ia poenja toean, Mousqueton lantes berdiri lempeng dan lantaran begitoe bebrapa oewang mas djato dari kantongnja, jaitoe oewang mas jang ia dapet dari pendjoealan roempoet, tapi ia tiada seraken pada toeannja.
„O! O!“ kata d'Artagnan dengen poengoet satoe oewang mas dan tjioem itoe oewang; „liat ini ada saroepa oewang mas jang baoenja ia berbaoe roempoet kring.“
Mousqueton lantaran begitoe djadi bingoeng dan moekanja djadi mera.
— „Djikaloe Porthos liat ini perkara tentoe ia djadi mara, Mousqueton, tapi akoe kasi ampoen pada kau; biar kita inget jang ini mas djadi penawar bagi kita poenja soesa dan biar kita bersoeka hati.“
Mousqueton poenja hati lantes djadi senang dan dengen tjepet ia selaken tiga koeda, kamoedian ia lantes naek atas koedanja dengen tiada begitoe banjak berdjengit sebagimana biasa.
Tiada lama poela Porthos djoega dateng, ia djadi sanget heran liat d'Artagnan tiada merengoet, sedeng Mousqueton girang keliatannja.
„Begimana,“ ia kata, „apa kau soeda diangkat djadi kapitein dan akoe boleh pake gelaran baron?“
„Kita maoe ambil itoe soerat pangkat,“ kata d'Artagnan dan djikaloe kita balik Mazarin nanti teeken itoe soerat soerat.“
