— 311 —
„Djotos orang sampe mati akoe brani sanggoepken“ kata Porthos.
„Kau boleh dateng boeka,“ kata d’Artagnan pada orang jang bawa arit, sedeng ia pegang satoe pistol dengen niatan boeat ketok itoe orang dengen gagang sendjatanja.
Itoe orang hampirken pintoe kreta.
Koetika dapet liat orang dateng, d’Artagnan bongkokken badannja sedikit, soepaja ia lebi gampang goenaken tangannja, tapi dengen begitoe kepalanja keloear sedikit dan matanja awasin itoe orang, jang moekanja ketoedjoe sinar api dari lentera.
Roepa roepanja itoe orang lantes kenalken d’Artagnan, kerna moekanja djadi poetjet, d'Artagnan djoega soeda kenalken itoe orang kerna ia rasa boeloe badannja mengkirik
„Toean d’Artagnan !“ treak itoe orang dengen moendoer satindak, „toean d‘Artagnan! Kasi liwat!“
Brangkali d‘Artagnan djoega menjaoet djikaloe pada itoe waktoe tiada kadengeran satoe soeara, sebagi satoe sampi jang maoe dipotong dipoekoel doeloe kepalanja dengen roejoeng. Porthos soeda jotos orang jang dateng deket padanja.
D’artagnan menengok ka itoe djoeroesan dan dapet liat saorang reba di tana.
„Madjoe koesir!“ kata d’Artagnan, „kasi lari biar kras!“
Koesir tjamboek koedanja dan ini binatang jang memangnja kras adatnja lantes brontak lari. Soeara orang mendjerit lantaran ketoebroek itoe kandaran ada kadengeran, kamoedian iaorang rasanja itoe kreta kebanting, rodanja kreta soeda liwat di satoe badan orang.
