— 310 —
Satoe orang bersendjata dengen satoe arit besar dateng deket pintoe kreta.
„Werda?“ ia tanja.
„He, apa kau tiada kenalken kretanja toean prins?“ kata d’Artagnan.
„Prins atawa boekan,“ Kata itoe orang, „boeka doeloe! Kita soeda di wadjibken djaga ini pintoe kota dan tiada satoe orang boleh liwat sablonnja kita dapet taoe siapa adanja itoe orang.“
„Apa moesti dibikin?“ menanja Porthos.
„Pardieu! djalan teroes,“ kata d’Artagnan.
„Tapi begimana kita bisa liwat?“ kata Mazarin.
— „Di pinggirnja itoe orang atawa liwat di atas badannja. Koesir, tjongklangken kau poenja koeda.“
Koesir angkat tjamboeknja.
„Djangan madjoe lagi satoe tindak,“ kata itoe orang jang roepa roepanja ada djadi kepala dari kawanan pengemis; "akoe nanti batjok kaki koeda kau."
— „Setan! djikaloe iaorang berboeat begitoe soenggoe sajang, itoe koeda masing masing ada berharga lebi dari saratoes pistol.“
„Akoe nanti ganti kau doea ratoes pistol boeat satoe koeda," Kata Mazarin.
— „Ja; tapi djikaloe kita poenja koeda soeda dipotong kakinja iaorang nanti bisa potong kita poenja leher djoega.“
„Satoe antaranja ada dateng hampirken akoe, apa akoe moesti boenoe padanja?“ menanja Porthos.
— „Ja, djikaloe kau bisa dengen djotosan sadja; sebrapa boleh djangan sampe menembak.“
