— 299 —
bikin satoe penghianat dapet oentoeng besar, Monseigneur ; boleh djadi kabetoelan orang serang kita di perdjalanan.“
Mazarin gemeter, tapi ia pikir lagi satoe orang jang ada niatan djahat tiada nanti kasi inget itoe perkara lebi doeloe.
„Akoe tiada pertjaja itoe perkara pada sembarang orang,“ kata Mazarin dengen tjepet : „boektinja boeat ini perkara jaitoe akoe pili kau boeat anter akoe.“
― „Apa Monseigneur tiada maoe brangkat sama sama Sri Ratoe?“
― „Tiada.“
„Begitoe!“ kata d’Artagnan jang moelai dapet doega maksoednja Mazarin.
„Ja, akoe ada satoe niatan laen,“ kata Mazarin, „djikaloe akoe brangkat sama sama akoe bikin itoe perdjalanan djadi lebi berbahaja ; djikaloe akoe brangkat blakangan, bahaja boeat akoe djadi lebi besar. Lagi apabila Radja dan Sri Ratoe soeda djaoe dari bahaja, akoe kwatir iaorang nanti loepa pada akoe, orang orang jang deradjatnja tinggi biasanja tiada inget orang poenja boedi.“
„Itoe betoel,“ kata d’Artagnan, sedeng matanja awasin tjintjin jang ada di tangannja Mazarin.
Mazarin dapet liat matanja d’Artagnan awasin tjintjin jang ia pake, maka dengen plahan ia balik matanja itoe tjintjin ka sebla dalem.
„Akoe maoe berdaja soepaja djangan sampe iaorang djadi koerang trima pada akoe,“ kata Mazarin dengen tersenjoem.
„Itoe ada satoe perboeatan baek jang saorang Christen haroes berboeat,“ kata d’Artagnan, „orang moesti djaga soepaja laen orang djangan
