— 295 —
Itoe hari di astana dibikin satoe pesta besar dan ampir sekalian kaoem familie Radja telah di oendang, jang dibikin alesan boeat itoe pesta dibilang hormat datengnja prins van Conde, laksamana jang soeda kalaken moesoe. Pada djem poekoel doeablas tengahari depan astana soeda penoe dengen kandaran dari tetamoe jang dateng. Seabisnja dahar orang boleh maen Kartoe di roeangan sebla dalem.
Ratoe Anna van Oostenrijk itoe hari Keliatannja lebi tjantik jagi, pada sekalian tetamoenja ia bitjara dengen manis boedi dan moekanja bertjahja terang, pikiran jang ia tentoe bisa bales sakit hati pada moesoenja soeda bikin hatinja djadi sanget senang.
Seabisnja orang bersantab Mazarin dapet tempo boeat singkirken dirinja. D’Artagnan soeda ada menoenggoe di kamar sebla depan. Kardinaal hampirken padanja dengen tersenjoem, pegang ia poenja tangan dan adjak d’Artagnan masoek di kamar toelisnja.
„Toean d’Artagnan," kata Mazarin sasoedanja ia doedoek di tempatnja, „Aakoe maoe oendjoek pada kau, kapertjaja’an paling besar jang satoe minister bisa kasi pada satoe officier."
D'Artagnan manggoet.
„Akoe harep,“ ia kata, „Monseigneur nanti soeka pertjajaken itoe resia pada akoe, boekan dengen genggem laen niatan dan anggep djoega jang akoe haroes dapet itoe kapertjaja’an."
― „Tiada ada satoe orang jang haroes lebi dipertjaja dari kau, sobat, dan oleh kerna itoe akoe panggil kau."
― „Akoe maoe mengakoe teroes terang, Monseigneur, soeda lama akoe harep dapet kapertjaja-
