— 294 —
bali dan bawa itoe toean du Vallon, tapi kau tinggal ia di loear, akoe maoe bitjara pada kau sadja."
D'Artagnan manggoet dan dalem hatinja kata:
„Doea orang prentanja satoe roepa, satoe djem, doea doea di astana Palais Royal; akoe soeda doega begimana adanja itoe perkara. O! ini resia djikaloe didjoeal pada coadjutor ada berharga lebi dari saratoes riboe francs."
„Apa kau pikirken itoe perkara ? menanja Mazarin dengen rasa kwatir
—„Ja, akoe pikir apa kita moesti dateng bersendjata atawa troesa.
—„ Bersendjata lengkep."
—„Baek, Monseigneur,"
D'Artagnan manggoet dan djalan kaloear teroes pergi pada Porthos, pada siapa ia tjeritaken begimana Mazarin soeda bitjara padanja dengen manis boedi.
XXIII.
Maski seantero kota Parijs keliatannja ada sanget riboet, pada waktos d'Artagnan dateng lagi di astana Palais Royal pada djem poekoel lima sore di sana keliatannja ada aman, tiada ada satoe perkara jang boleh bikin orang boeat kwatir.
Tapi djikaloe dipikir lebi djaoe sabenernja tiada ada lantaran boeat dikwatirken lagi. Sri Ratoe soeda lepas toean Broussel dan toean Blanemesnil, djadi di astana tiada ada apa jang moesti dikwatirken, kerna rahajat negri tiada ada apa jang diminta lagi. Keriboetan di djalan djalanan ada sisanja dari pembrontakan dan lama lama tentoe nanti ilang sendiri.
