— 264 —
„Siapa taoe?“ kata coadjutor ; „orang begitoe ada sebagi gledek, sasoedanja kena disamber baroe orang dapet taoe pakerdja’annja.“
Sekalian orang jang ada dalem itoe roeangan djadi mengkirik koetika denger coadjutor berkata begitoe.
Ratoe Anna pegang kadoea tangannja di dada sebagi ia maoe tahan soepaja djangan sampe djadi njata jang dadanja berdebar debar lantaran hatinja bergontjang kras.
„Porthos,“ kata d’Artagnan, „awasin itoe padri.“
„Ja, akoe liat padanja,“ kata Porthos, „abis?“
— „Ia ada satoe laki laki.“
Porthos awasin d’Artagnan dengen bengong, roepa roepanja ia tiada mengarti sobatnja poenja maksoed.
„Sri Baginda tentoe nanti atoer apa jang perloe,“ kata coadjutor dengen tiada kesian lagi pada Ratoenja ; „tapi akoe doega itoe atoeran nanti bikin rahajat negri djadi semingkin mara.“
„Djikaloe sampe kedjadian begitoe, toean coadjutor,“ kata Ratoe Anna dengen soeara menjindir, „kau jang djadi kita poenja sobat dan ada kekwasa’an besar atas itoe orang orang nanti bikin padem lagi ini hoeroe hara dengen bagi kau poenja doa slamet pada marika.“
„Akoe kwatir pada itoe waktoe nanti soeda djadi kasep dan akoe poenja kekwasa’an soeda abis, sedeng djikaloe Sri Baginda lepas Broussel sekarang ini pembrontakan djadi poetoes dan kamoedian Sri Baginda boleh hoekooem brat, pada orang orang jang maoe tjoba geraken lagi itoe perkara.“
„Apa sekarang akoe tiada ada hak boeat hoekoem ia orang ?“ treak Sri Ratoe.
