— 263 —
kata poela Mazarin ; „itoe tjoema boeat pribasa kata sadja; kau taoe akoe tiada begitoe pande bahasa Frans sebagi kau, toean coadjutor.“
„Kita toeroet bersidang dalem vergadering dari pamerenta agoeng,“ kata d’Artagnan, „tapi koetika kita berkoampoel di La Rochelle dengen Athos dan Aramis, kita oeroes itoe vergadering lebi baek.“
„Di benteng Saint Gervais,“ kata Porthos.
— „Di sana dan di tempat laen djoega.“
Coadjutor tinggal diam sampe ia rasa maranja Ratoe Anna soeda djadi koerang, kamoedian ia kata dengen tinggal sabar :
„Djikaloe Sri Baginda tiada satoedjoe dengen akoe poenja pikiran, akoe kira itoe perkara kedjadian lantaran Sri Baginda pikir satoe djalan jang lebi baek. Akoe sampe kenal Sri Baginda dan mantri mantri poenja kepandean jang tentoe tiada nanti tinggal diam dalem ini oeroesan, satoe pembrontakan jang brangkali besok boleh bikin perobahan dalem pamerentahan.“
„Djadi menoeroet kau poenja pikiran,“ kata Ratoe Anna dengen gigit bibirnja, „itoe keriboetan jang kemaren, ini hari soeda djadi satoe pembrontakan dan besok nanti berdaja boeat bikin djato pamerenta?“
„Betoel njonja,“ kata coadjutor.
„Tapi djikaloe orang moesti pertjaja apa jang kau bilang, toean, rahajat negri djadi soeda tiada taro inda lagi pada Radjanja?‘
„Ini taon ada tempo jang djelek boeat Radja radja,“ Kata coadjutor dengen gojang kepala ; „tjoba liat sadja di negri Inggris.“
„Beroentoeng di negri Frans tiada ada Olivier Cromwell,“ kata Sri Ratoe.
