— 262 —
menengok lagi, „akoe bitjara pada toean coadjutor."
„Djikaloe itoe pertanja’an dibikin pada akoe," kata coadjutor jang tinggal sabar, „akoe moesti djawab jang akoe ada satoedjoe dengen pikirannja maarschalk."
Moekanja Ratoe Anna djadi mera, sedeng matanja, roepa roepanja matanja mendelik maoe kaloear, ia poenja bibir jang biasanja berwarna mera telah djadi poetjet ; itoe perkara soeda bikin sekalian orang djadi sanget kaget, hingga Mazarin jang sring liat Sri Ratoe mara toeroet djadi bingoeng.
„Lepas Broussel!" treak Ratoe Anna dengen tersenjoem asem; „betoel satoe nasehat baek! Orang bisa dapet kenjata’an jang itoe nasehat kaloear dari satoe padri!"
Coadjutor tinggal diam sadja. Roepa roepanja itoe hari ia tiada sekali perdoeliken orang hinaken padanja; tapi hatinja di dalem djadi semingkin mendongkol dan berpikir begimana ia moesti bales itoe perboeatan. Ia awasin Sri Ratoe dengen tiada berkata satoe apa, tapi dari kelakoeannja orang bisa dapet kenjata’an jang ia ingin Mazarin tjampoer moeloet.
Biasanja Mazarin bisa berpikir banjak tapi tiada soeka bitjara banjak.
— „Wel, akoe kira nasehatnja satoe sobat haroes ditoeroet. Baek seraken sadja Broussel pada rahajat negri idoep atawa mati dan itoe perkara soeda abis."
— „Djikaloe kau seraken Broussel soeda tiwas djiwanja, Monseigneur, betoel ini perkara djadi abis, tapi djadi laen sekali dari apa jang kau kira."
„Apa akoe telah bilang idoep atawa mati ?"
