— 227 —
merasa menjesel boeat satoe perkara koerang baek jang ia soeda perna berboeat.“
—„Lantaran apa kau doega begitoe?“
—„Pada tanggal 23 dari tiap tiap boelan ia minta akoe sembajang boeat rohnja saorang jang soeda meninggal lantaran dianiaja. Kemaren akoe soeda toeloeng lagi padanja.“
—„Siapa namanja itoe orang?“
—„Ia seboet namanja Maillard, tapi akoe doega ini nama ada palsoe.“
—„Kau kira kita nanti bisa ketemoe ia di tempat jang biasa ?“
—„Tiada bisa sala lagi, Monseigneur.“
—„Mari kita pergi padanja, toean pastoor, dan djikaloe ia poenja keada’an ada betoel sebagimana kau soeda bilang, betoel betoel ini orang tenaganja ada lebi bergoena bagi kita poenja oeroesan dari pada itoe doea orang jang telah divoorstel oleh kau poenja kawan.“
Coadjutor lantes berpake pakean jang biasa dipake pada itoe masa oleh orang orang bangsawan, pake ia poenja topi vilt dengen satoe boeloe berwarna mera, pake ia poenja band, di mana ada digantoeng satoe pedang besar, toetoep badannja dengen satoe mantel besar dan toeroet itoe pastoor kaloear.
Iaorang djalan kaki menoedjoe ka gredja Saint Eustache dan sepandjang djalan iaorang ketemoeken bebrapa koempoelan rahajat negri, jang keliatannja bingoeng, lagi bitjaraken perkara perkara jang baroe kedjadian itoe hari. Tapi roepa roepanja itoe rahajat negri ada sebagi satoe koempoelan tawon jang abis dioesir dari sarangnja; iaorang menjomel pandjang pendek, keliatannja bingoeng tiada taoe apa jang iaorang moesti berboeat, dan djikaloe
