— 191 —
„Slamet pandjang oemoer, Radja!“ orang treak dari koeliling tempat.
Radja jang memang pengawakannja ketjil ampir masi anak anak soeda kaloearken kepalanja di loear djendela kreta boeat bales hormat rahajatnja dan lantaran begitoe orang djadi bertreak lebi kras lagi.
Dengen plahan itoe kreta djalan, sebab djalanan soeda djadi sesek dan koetika soeda sampe di depan gredja, itoe sekalian kreta ilang dikasi masoek dalem pekarangan gredja di sebla blakang dan tiada lama poela perkara sembajang dimoelai.
Sedeng Radja dan pengikoetnja moelai doedoek di masing masing poenja tempat dalem gredja, satoe kreta di mana ada digoeba tjap kabesaran dari familie familie Comminges didjalanken dengen plahan menoedjoe ka Saint Christophe straat, jaitoe djalanan di mana ada roemanja toean Broussel. Pada itoe koetika itoe djalanan ada sanget sepi; ampat soldadoe dari barisan pendjaga dan satoe officier politie naek dalem kreta dan kasi toeroen tendanja; kamoedian iaorang mengintip dari dalem kreta sebagi orang ada menoenggoe satoe tanda atawa orang jang nanti kasi prenta apa iaorang moesti berboeat.
Sakalian orang jang ada di itoe tempat tiada dapet liat atawa perdoeliken itoe perkara, kerna masing masing awasin itoe gredja dalem mana iaorang poenja Radja masoek, sedeng Friquet jang biasanja soeka tjampoer tangan dalem laen orang poenja oeroesan, itoe koetika lagi dahar ia poenja roti dan boea abrikoos di atas genteng dari satoe roema jang pernanja di sebrang gredja Notre Dame.
Koetika itoe sembajang soeda ampir abis, Sri
