— 162 —
dan ada sedia satoe balatantara besar; satoe tanda dengen akoe poenja tangan soeda tjoekoep boeat goenaken apa jang perloe. Sekarang kau boleh liat, sapoeter akoe satoe potong barang berharga tiada ada, itoe perkara brangkali bikin kau djadi heran; tapi boeat djalanken satoe tipoe dari mana akoe ada harepan, itoe perkara nanti boleh toeloeng akoe poenja djiwa, akoe tjoema ada ini satoe sobat lama, Lord de Winter dan kau orang, toean toean jang baroe ini sekali akoe perna ketemoe, tapi kau orang ada akoe poenja bangsa djoega.“
„Itoe soeda tjoekoep, njonja,“ kata Athos dengen manggoet renda: „djikaloe ini tiga orang bisa toeloeng Sri Baginda poenja djiwa, kita bertiga poenja djiwa boleh djadi pegantinja.“
„Trima kasi, toean. Tapi denger doeloe, akoe boekan sadja ada satoe Ratoe jang sanget tjilaka, tapi akoe djoega djadi iboe jang ampir djadi nekat. Akoe poenja anak anak soeda dipisa djaoe dari akoe; hertog van York dan prinses Charlotte ada di tangan moesoe, di mana iaorang moesti rasaken banjak ganggoean dan sengsara; Radja, akoe poenja swami, keidoepannja di negri Inggris ada begitoe soesa, hingga djikaloe ia diboenoe, ia nanti anggep itoe perkara sebagi satoe djalanan pantes boeat bikin abis ia poenja sengsara. Tjoba kau batja ia poenja soerat jang Lord de Winter soeda bawa pada atoe. Batja ini soerat.”
Athos dan Aramis minta idzin boeat toelak itoe perminta’an.
„Djangan begitoe, batja,“ kata Permisoeri.
Athos batja dengen soeara kras itoe soerat jang kita soeda kenal boenjinja, dalem mana Radja Karel ada menanja, apa ia boleh me-
