— 117 —
denger kau poedji padanja, tapi kau tiada sekali inget baek bagi toeroenannja.“
Djidatnja Mazarin soeda djadi basa dengen kringet.
„Dengen sasoenggoenja akoe hargaken tinggi dan poedji Radja Hendrik poenja kegagahan dan keadilan,“ kata Mazarin dengen bitjara teroes dalem bahasa Frans; „seandenja Radja Karel I, jang akoe harep Allah nanti lindoengken, dateng di negri Frans, akoe poenja tempat, ja akoe poenja roema sendiri akoe nanti bikin sedia boeat ia tinggal; tapi di itoe tempat nanti djadi banjak bahajanja; satoe tempo rahajat negri nanti bakar itoe roema, sebagimana iaorang soeda berboeat dengen tempat tinggalnja maarschalk d'Ancre. Itoe koetika Concini berboeat begitoe boeat kebaeannja negri Frans.“
„Ja, Monseigneur, sebagimana kau djoega maoe berboeat,“ kata Permisoeri dengen menjindir.
Mazarin berboeat sebagi ia tiada taoe, ia telah disindir dan tjeritaken teroes pri halnja Concini.
„Baek kita bitjaraken lagi ini oeroesan,“ kata Permisoeri jang soeda ilang sabarnja; „apa kau djawab atas akoe poenja pertanja'an?“
„Njonja,“ kata Mazarin dengen swara lebi manis lagi. „Apa Sri Baginda soeka akoe kasi sedikit nasehat? Lebi doeloe akoe harep, Sri Baginda soeka pertjaja jang akoe, dengen rendaken akoe poenja diri di bawa Sri Baginda poenja kaki, senantiasa ada sedia boeat berboeat apa sadja jang boleh bikin Sri Baginda poenja hati djadi senang.“
— „Bitjara, toean, nasehatnja saorang jang begitoe teliti sebagi kau, tentoe ada baek.“
