— 115 —
bisa mengilang, ia soeda doega, tentoe Permisoeri dateng boeat minta padanja sala satoe perkara ; djikaloe satoe Ratoe jang ia soeda sanget hinaken bisa dateng padanja dengen tersenjoem, tentoe ia dateng boeat minta pertoeloengan.
„Toean Kardinaal,“ kata Permisoeri, „lebi doeloe akoe ada niat boeat bitjaraken oeroesan jang akoe maoe bitjaraken sekarang pada akoe poenja ipar Sri Ratoe, tapi kamoedian akoe pikir, oeroesan negri ada oeroesan orang lelaki.“
„Njonja,“ kata Mazarin, „akoe harep Sri Baginda soeka pertjaja, itoe kahormatan besar bagi akoe, soeda bikin akoe djadi maloe“
„Ia sanget rendaken dirinja,“ Permisoeri pikir dalem hatinja, „apa brangkali ia soeda dapet doega akoe poenja niat?“
Iaorang sampe di kamarnja Kardinaal dan sasoedanja Permisoeri doedoek di satoe korsi males jang Mazarin soeda angsoerken padanja, Kardinaal kata:
„Akoe harep Sri Baginda soeka kasi denger prenta apa jang Sri Baginda poenja hamba jang paling renda moesti djalanken.“
„Hak boeat tagi prenta akoe soeda tiada ada poenja lagi, toean,“ kata Permisoeri, „tapi sekarang soeda djadi akoe poenja kebiasa'an boeat minta pertoeloengan. Akoe nanti rasa dirikoe sanget beroentoeng, djikaloe kau soeka loeloesken akoe poenja perminta'an.“
„Akoe sedia boeat denger itoe perminta'án njonja,“ kata Mazarin.
„Toean Kardinaal, akoe maoe bitjaraken oeroesan perkara prang jang lagi dimaloemken antara akoe poenja soeami dengen rahajat jang lagi brontak. Brangkali kau blon dapet taoe, di ini waktoe di negri Inggris orang lagi ber-
