— 113 —
„Tapi boekan begitoe sadja“, kata poela Mazarin; „kau poenja oeroesan sendiri soeda bikin akoe djadi boeat pikiran dan lantaran soeratnja toean Cromwell, akoe djadi lebi soeka pada kau, maka akoe oelangken lagi, tjara begimana akoe bisa toeloeng dalem kau poenja oeroesan?“
Mordaunt diam berpikir bebrapa lamanja dan sasoedanja ilang sangsinja ia berbangkit maoe bitjara, tapi djoestroe itoe koetika Bernouin dateng terboeroe boeroe masoek dalem kamar dan berbisik pada Kardinaal.
„Monseigneur,“ kata itoe penggawe dengen swara plahan, „Permisoeri Henriette dianter oleh saorang bangsawan Inggris baroe sampe di depan astana.“
Mazarin lompat dari korsinja dan maski ia lantes doedoek kombali, itoe oetoesan soeda dapet liat itoe perkara dan tiada djadi boeka moeloetnja boeat bitjaraken apa jang ia soeda pikir dan maoe bilang pada Mazarin.
„Toean,“ kata Kardinaal pada Mordaunt, „kau soeda mengarti apa jang kita bitjaraken, boekan? Akoe seboet kota Boulogne, kerna akoe pikir boeat kau sembarang tempat sama djoega; djikaloe kau kira laen tempat ada lebi baek, kau boleh bilang: tapi kau moesti mengati, akoe ada di antara orang jang berkwasa dan moesti berlakoe sanget ati ati, maka akoe ingin orang loear tiada dapet taoe, apa jang kau soeda dapet di ini kota.“
„Akoe brangkat, Monseigneur,“ kata Moedaunt dengen djalan menoedjoe ka pintoe, dari mana ia soeda masoek.
„Djangan dari sitoe, toean!“ Mazarin kata dengen tjepet; „djalan dari ini pintoe laen,
