— 105 —
tijapnja, tapi blon djoega ia boeka, kamoedian ia awasin moekanja itoe oetoesan dan moelai pantjing padanja, kerna Mazarin doega, djikaloe ia adjak orang bitjara dengen awasin moekanja itoe orang, djarang jang bisa simpen resianja lebi lama.
„Kau masi sanget moeda, toean, boeat djadi satoe oetoesan dalem perkara penting, jang sringkeli tiada bisa dioeroes beres oleh orang orang jang biasa dalem oeroesan politiek,“ kata Mazarin.
—„Akoe poenja oemoer doeapoeloe tiga taon, Monseigneur; tapi Eminentie doega sala, djikaloe Eminentie bilang, akoe masi moeda. Akoe ada lebi toea dari Eminentie, maski akoe tiada ada begitoe pande sebagi Monseigneur.“
—„Kenapa begitoe, toean? akoe tiada mengarti.“
—„Akoe maoe bilang, idoep dengen sengsara teritoeng doea kali lipet lamanja, dan akoe soeda idoep sengsara dari oemoer tiga taon.“
„O! sekarang akoe mengarti,“ kata Mezarin, „kau tiada ada poenja harta? Kau Saorang miskin, betoel apa tiada ?“
Dalem hatinja Mazarin kata
„Itoe orang orang Inggris jang bikin pembrontakan semoea pengemis dan tiada taoe maloe.“
„Sabenernja akoe moesti trima satoe harta besarnja anem millioen franc, tapi orang soeda rampas itoe harta,“ kata itoe orang moeda.
„Apa kau boekan bangsa koeli koeli poenja toeroenan?“ menanja Mazarin dengen sanget heran.
—„Seandenja akoe dapet trima akoe poenja gelaran, akoe ini tempo ada diseboet satoe
