— 105 —
lord; dan djikaloe akoe pake akoe poenja nama jang sedjati, kau nanti kenalken, itoe nama ada terkenal sebagi nama jang tersohor moelia.“
—„Abis siapa kau poenja nama ?“
„Mordaunt,“ djawab itoe anak moeda dengen manggoet renda.
Mazarin mengarti, oetoesannja Olivier Cromwell tiada soeka orang taoe namanja jang sedjati.
Kardinaal tinggal diam bebrapa lamanja, tapi lantaran itoe djawaban ia djadi awasin Mordaunt lebi teliti.
Itoe anak moeda tinggal diam dan moekanja tiada sekali keliatan beroba.
„Kenapa setan tiada maoe ambil sekalian orang pembrontakan Inggris,“ Mazarin kata dalem hatinja, „ini orang moekanja sama djoega marmer, orang tiada bisa doega, apa jang ia pikir dalem hatinja.“
Kamoedian ia bitjara lagi pada itoe oetoesan. „Tapi kau tentoe masi ada poenja keponakan ?“
—„Ada satoe sadja, Monseigneur.“
—„Apa ia tiada toeloeng pada kau ?“
—„Tiga kali akoe soeda dateng minta ia poenja pertoeloengan dan tiga kali ia soeda prenta boedjangnja oesir akoe. “
„Ja, Allah, toean Mordaunt!“ kata Mazarin dengen swara lemes, „ia harep dengan bikin roepanja sanget kesian pada itoe anak moeda, ini oetoesan nanti soeka bitjara lebi terang, akoe djadi imgin tape kau poenja perkara. Apa kau tiada taoe, siapa adanja kau poenja orang toea?“
—„Baroe dapet taoe dalem tempo sedikit hari sadja.“
— „Dan sablonnja itoe tempo ?“
