— 90 —
loe toean soeka semboeniken akoe, tentoe tiada ada jang bisa dapet tjari akoe.“
— „Ja, dengen senang akoe soeka berboeat itoe perkara, maski dengen ini perboeatan akoe boleh dapet bahaja besar, lantaran akoe brani semboeniken satoe orang peroesoehan."
— „Tapi toean djoega taoe, akoe brani boeang akoe poenja djiwa boeat membela pada toean"
— „Akoe taoe dan inget itoe perkara, Planchet; akoe tjoema bisa loepa perkara jang memang akoe moesti loepaken. Djangan kwatir dan doedoek dahar sisa dari akoe poenja barang makanan, kerna akoe liat, kau poenja mata tiada brentinja menoedjoe ka itoe piring “
— „Betoel, toean, kerna dari semalem akoe tjoema dahar sapotong roti dengen manisan."
— „Kesian, dahar sadja sampe kenjang."
— „O, toean toeloeng akoe poenja djiwa boeat kadoea kalinja."
Planchet lantes doedoek dahar. d'Artagnan djalan lagi moendar mandir di kamarnja; ia berpikir, tjara begimana ia bisa goenaken Planchet boeat kebaean dirinja.
Sasoedanja Planchet abis dahar, ia berbangkit sebagi orang jang maoe ilangken tjape, seabisnja bekerdja berat.
Itoe koetika d’Artagnan soeda dapet satoe pikiran, ia menanja:
„Apa kau taoe Athos tinggal di mana ?"
— „Tida, toean"
— „Setan! Porthos di mana roemanja ?"
— „Djoega tiada dapet taoe, toean."
— „Aramis? "
— „Tida taoe djoega."
— „Setan!"
