— 85 —
dan satoe botol anggoer dibawa di kamarnja.
d'Artagnan jang menoempang dengen tiada bajar satoe apa, ada tinggal dalem satoe kamar di tingkatan ka'ampat jang pernanja di betoelan pantjoran dari itoe roema Ia berboeat begitoe, soepaja Madeleine bisa kasi sewa kamar kamar jang lebi baek pada laen tetamoe jang bajar oewang sewanja.
d'Artagnan djalan troes ka kamarnja, di mana ia lantes simpen itoe oewang dan koetika boedjang soeda bawa masoek makanannja, ia lantes koentji kombali pintoe kamarnja.
Seabismja dahar ia lantes tidoer dan pada waktoe soeda deket pagi ia bangoen, djalan moendar mandir dalem kamarnja dengen berpikir:
„Di taon '43, betoel anem boelan sablonnja Kardinaal meninggal, akoe ada trima satoe soerat dari Porthos. Di mana itoe koetika akoe trima itoe soerat.... o, koetika kepoeng kota Besancon, sekarang akoe inget itoe perkara.... akoe baroe batja sapotong dari soeratnja dan pada lembar kadoes, dalem mana ada diseboet Athos poenja nama dan tempat tinggal, moesoe dateng menjerang dan angin kras soeda bawa terbang itoe soerat.... pada masa akoe masi moeda tentoe akoe soeda boeroe itoe kertas, tapi djikaloe orang soeda ada oemoer..., djadi akoe biarken sadja angin bawa itoe kertas ka tempat orang Spanjol. Djadi tempatnja Athos akoe tiada dapet taoe, tapi akoe inget ada trima lagi satoe soerat dari Porthos, tjoba akoe tjari itoe soerat.“
d'Artagnan boeka satoe latji dari lemarinja dan antara bebrapa soerat soerat ia lantes kenalken toelisannja Porthos. Dengen girang ia
