— 83 —
perkara jang d'Artagnan ingin, proetnja merasa lapar, badannja dingin dan ia djadi soeka lagi pada itoe njonja; ja ampoenken kesalahannja dan tinggal lagi di kamarnja jang lama.
Begitoe adanja itoe lantaran, maka d'Artagnan djadi tinggal di roema makan „de Ree.“
− − − −
VII.
Dengen berpikir sepandjang djalan kadang-kadang d'Artagnan oesoet kantong oewang jang ia baroe trima dari Kardinal Mazarin; ia inget djoega itoe tjintjinnja jang ada di djeridjinja Kardinaal.
„Djikaloe akoe dapet lagi itoe tjintjin,“ kata d'Artagnan dalem hatinja, „akoe lantes maoe djoeal dan oewangnja akoe bliken sapotong tana deket roema ajahkoe, kerna itoe astana ampir tiada ada pekarangannja. Di sana akoe nanti tinggal diam menoenggoe sampe sala satoe nona hartawan dateng minta akoe djadi soeaminja; kamoedian akoe moesti ada tiga anak lelaki, jang pertama akoe djadiken saorang jang biasa idoep besar sebagi Athos, jang kadoea moesti masoek djadi militair sebagi Porthos dan jang katiga moesti djadi padri sebagi Aramis. Demi kahormatankoe, idoep begitoe matjem ada banjak lebi baek dari djadi luitenant barisan musketier, tapi itoe Mazarin jang kikir tentoe tiada gampang seraken tjintjinnja.“
Apa d'Artagnan nanti berkata, djikaloe ia dapet taoe, Ratoe Anna soeda seraken itoe tjintjin pada Kardinaal Mazarin boeat disampeken pada d'Artagnan ?
Koetika ia sampe di Tiquetonne-straat, ia dapet liat di depan roemanja ada banjak orang berkoempoel dengen bikin riboet.
