— 69 —
Sri Ratoe sendiri soeda kasi idzin boeat itoe perkara.”
„Sri Ratoe?“ menanja d’Artagnan dengen sanget heran dan ini sekali ia tiada belaga lagi, tapi betoel betoel ia soeda djadi heran.
„Betoel, Sri Ratoe soeda prenta akoe berboeat ini perkara dan boeat boektinja akoe telah di prenta boeat toendjoek pada kau ini tjintjin, jang kau kenal,“ kata Kardinaal. „Ini tjintjin Sri Ratoe soeda bli kombali dari toean des Essarts."
Kardinaal angsoerken tangannja boeat kasi d'Artagnan liat itoe tjintjin, dan d’Artagnan telah mengela napas, koetika ia kenalken itoe barang permata.
„Betoel, akoe kenalken itoe inten, kapoenjaannja Sri Ratoe,“ kata d’Artagnan.
—„Sekarang kau soeda dapet kenjata’an, akoe bitjara atas namanja Sri Baginda. Menjaoet sadja dengen troes trang dan tiada oesa maen komedie lagi. Akoe soeda kasi inget pada kau dan oelangken lagi ini perkara: di ini bitjara’an ada bergantoeng kau poenja peroentoengan.”
—„Demi kahormatankoe, sanget soesa akoe tjari itoe peroentoengan, Monseigneur soeda loepaken akoe begitoe lama.“
—„Dalem tempo delapan hari sadja soeda _ tjoekoep boeat soesoel itoe keroegian. Tjoba bitjara, kau sekarang ada di sini, tapi di mana adanja kau poenja kawan ?"
—„,Akoe tiada taoe, Monseigneur.“
—„Kau tiada taoe di mana adanja kau poenja sobat sobat?“
—„Tida, soeda lama kitaorang terpisa, jang laen masing masing soeda lepas iaorang poenja pakerdja’an.“
