— 62 —
tapi itoe koetika ia dapet liat satoe doos dari kajoe tjendana ditaboer perak, ia ambil itoe doos dan berkata poela:
„Akoe soempa di hadepan ini tanda mata: akoe doeloe tjinta pada Buckingham, tapi ia boekan akoe poenja kendak."
„Tapi itoe barang ada tanda mata apa, njonja?" menanja Mazarin dengen tersenjoem, „kerna akoe sebagi kebanjakan orang Italie tiada pertjaja barang begitoe."
Sri Ratoe kasi kaloear dari kaloengnja satoe koentji ketjil, seraken itoe barang pada Mazarin dan kata:
„Boeka itoe doos dan kau nanti liat sendiri.“
Dengen heran Mezarin trima itoe koentji, boeka itoe doos, dalem mana ia tjoema dapet liat satoe piso jang soeda karatan serta does soerat, antara mana jang satoe soeda djadi kotor dengen bekas dara.
„Apa itoe?" menanja Mezarin.
„Kau ingin taoe ini barang apa? kata Ratoe Anna dengan oendjoek pada itoe peti, akoe nanti kasi taoe. Itoe doea soerat ada soerat jang akoe soeda taoe toelis padanja, itoe piso ada sendjata, dengen apa Felton soeda boenoe Buckingham. Batja itoe soerat dan kau nanti dapet ketrangan, apa akoe soeda bitjara djoesta apa tiada."
Maski dikasi idzin, Mezarin tiada batja itoe soerat, tapi ia angkat itoe piso jang besinja soeda ampir abis, kerna dara jang masi lengket koetika Buckingham tjaboet itoe sendjata dari loekanja soeda makan itoe besi dengen p'ahan. Sasoedahnja, liat itoe piso bebrapa lamanja, ia kasi masoek lagi dalem doos.
