— 61 —
„Kau hinaken akoe, toean !“
„Akoe ingin,“ kata Mazarin dengen tiada sekali perdoeliken pada tingka lakoenja Ratoe, „akoe ingin ini waktoe kau berboeat bagi kau poenja soeami apa jang kau doeloe telah berboeat bagi kau poenja ketjintaän.“
„Apa itoe tjerita boeat bikin boesoek akoe poenja nama ditimboelken lagi ?“ kata Ratoe.
„Akoe kira, itoe perkara orang soeda koeboer, kerna kau tiada taoe bitjara satoe apa dari itoe hal, tapi sekarang kau sendiri jang moelai tjeritaken itoe oeroesan. Baek kita oeroes ini perkara berdoea, tapi dari wates ini waktoe, oeroesan antara kita berdoea soeda djadi poetoes, kau mengarti !?“
„Tapi, njonja,“ kata Maz rin jang djadi heran liat Ratoe ada begitoe gaga bitjaranja; „akoe tiada minta kau tjeritaken ini perkara.“
„Tapi akoe maoe kasi kau denger itoe tjerita,“ menjaoet Anna van Oostenrijk. „Denger, akoe maoe kasi kau taoe, pada itoe koetika ada ampat hati jang setia, ampat orang gaga soeda toeloeng akoe poenja kahormatan jang ada lebi berharga dari akoe poenja djiwa.“
„Djadi kau mengakoe !“ kate Mazarin.
―„Apa tjoema kahormatannja orang orang jang berdosa sadja boleh dapet bahaja, toean, dan apa tiada bisa djadi jang dengen tipoe, apapoela saorang prempoean, dengen gampang dibikin hina namanja? Betoel, boeat orang jang tiada dapet taoe begimana doedoeknja itoe perkara, nanti doega, akoe jang sala, tapi akoe brani soempa tiada ada begitoe roepa. Akoe brani soempa di ....“
Sri Ratoe tjoba inget nama dari sala satoe melaekat boeat djadi saksi dalem itoe soempa,
