— 370 —
Akoe soempa, seantero akoe poenja badan dan sampe tetesan dara jang pengabisan ada dalem akoe poenja badan, akoe nanti goenaken soepaja boleh tinggal dipandang sebagi satoe sobat dari saorang sebagi kau, Athos, dan tinggal bersobat djoega pada kau, Aramis."
D'Artagnan toebroek dan peloek Athos.
„Anakkoe! kata Athos jang peloek dengen kras sobatnja.
„Dan akoe," kata Porthos, „akoe tiada maoe soempa satoe apa! akoe djadi sesek! sacrebleu ! Djikaloe akoe moesti bertanding dengen kau, soeda tentoe akoe seraken dirikoe boeat ditoesoek kerna akoe tiada ada laen orang boeat ditjinta, melaenken kau orang sadja."
Dengen kaloear aer mata Porthos toebroek dan peloek Aramis.
„Ini perkara jang memang akoe harep, sobat sobat," kata Athos, „akoe soeda doega, dari orang orang jang poenja hati sebagi kau moesti djadi begini; ja, akoe soeda bilang dan oelangken lagi, persariketan antara kita orang tiada nanti bisa dibikin poetoes, maski kita poenja haloean masing masing djadi laen. Akoe taro harga atas kau poenja maksoed, d' Artagnan, dan begitoe djoega akoe hargaken maksoednja Porthos; tapi maski kita moesti toeroet haloean jang berbanta satoe pada laen, biar kita tinggal bersobat; mantri mantri, prins dan Radja radja nanti bisa ilang sebagi satoe angin toefan jang bikin banjak keroesakan, tapi tjoema sakedjep sadja, hoeroe hara dalem negri djoega Danti djadi padem, sebagi satoe kaleng berisi minjak tana jang berkobar kra, tapi nanti djadi padem apabila minjaknja abis, tapi kita tinggal bersobat
