— 340 —
„Ach, toean! di seblanja! betoel deket jang doeloe. Ini tembakan ada pasangan dari tembakan di Amiens.“
Porthos soeda djadi sanget mara, ia baliken koedanja dan terdjang itoe orang jang masi berdiri dan lagi tjoba boeat kaloearken pedangnja, tapi sablonnja ia keboeroe tarik sendjatanja, Porthos soeda sampe dan kemplang padanja dengen gagang pedangnja sampe itoe orang djato pangsan.
Dengen merinti Mousqueton djatoken dirinja dari atas koeda, lantaran loekanja ia tiada bisa tinggal doedoek di atas sela.
Koetika dapet liat moesoe dateng lagi d'Artagnan tinggal- diam dan isi ia poenja pistol, sedeng di koeda jang ia baroe toenggang ada satoe snapan digantoeng di sebla sela.
„Akoe soeda sedia lagi,“ kata Porthos jang dateng deket sobatnja, „apa kita toenggoe ia dateng, apa lebi baek kita serang iaorang ?“
„Terdjang sadja,“ kata d’Artagnan.
„Madjoe!“ bertreak Porthos.
Iaorang lantes lariken koedanja ka depan, itoe koetika tinggal doeapoeloe pas lagi djaoenja dari moesoe jang mendatengin.
„Atas namanja Radja, kasi kita orang liwat!“ kata d’Artagnan.
„Radja tiada perloe tjampoer tangan dalem ini oeroesan!“ menjaooet satoe swara dari satoe koempoelan aboe jang ngeboel dan toetoep roepanja orang jang soeda kasi itoe djawabapan.
„Baek kita nanti liat Radja tiada boleh djalan troes di mana ia soeka“ kata d’Artagnan.
„Saksiken sendiri sadja itoe perkara!“ kata poela swara jang baroesan.
Ampir bebareng kadengeran swara does
