— 298 —
nanti djadi koerang baek bagi Mazarin, jang sanget kwatir ini hertog nanti bales sakit hati padanja.
Hertog de Beaufort pikir dalem hatinja begimana di astana Palais Royal (astana karadja'an) nanti keada'annja apabila dengen bingoeng Mazarin dateng berdjoempa pada Sri Ratoe boeat berkata: „toean de Beaufort soeda lari!“ Dengen berpikir begitos roepa hertog djadi ketawa geli dalem hatinja, ia koesek koesek tangannja dan kata: „Akoe soeda merdika !“
Betoel djikaloe ia djadi sedar kombali, ia dapet kenjata'an jang ia masi ada dalem pendjara dan kira kira sapoeloe tindak djaoenja ada La Ramee lagi doedoek awasin padanja, tapi djikaloeia pikir begimana pikiran menoesia dengen gampang bisa beroba, ia poenja hati djadi senang lagi. Itoe koetika hertog dapet inget pada Grimaud jang bermoela ia sanget bentji, Grimaud jang tiada soeka banjak bitjara dan soeda ganggoe ia poenja sedikit kasenangan dalem tempat hoekoeman, soeda bebalik djadi satoe pembantoe besar padanja.
Boekan sadja hertog de Beaufort itoe hari menoenggoe tempo dengen tiada sabar, tapi La Ramee djoega sabentar bentar liat lotjeng dan menoenggoe djem anem sore dengen sanget koerang sabar. Ia pikir dalem hatinja nanti dapet satoe kahormatan besar boeat doedoek bersantab berdoea sadja dengen satoe hertog famille dari Radjanja, apapoela toekang roema makan, pada siapa ia pesen itoe barang makanan soeda djandjiken padanja satoe pastel dari fasant, boekan dibikin dari daging ajam sebagi mana ia soeda dahar doeloean dan bosat itoe anggoer Bourgogne ia nanti dapet laen roepa
