— 293 —
Frans, blon boleh dikoeboer dalem tana djikaloe ia poenja poetra atawa laen orang jang soeda gantiken ja djadi Radja di itoe negri, blon meninggal dan moesti ditaro di itoe tempat.
Babrapa lama iaorang berdiri berdoea dengen tiada berkata satoe apa, kamoedian dengen oendjoek pada itoe peti Athos berkata:
„Itoe toelang toelang jang ada dalem ini peti ada toelangnja saorang jang adatnja sanget lema dan tiada sekali ada poenja kelakoean jang moelia, maski begitoe dalem tempo jang ja doedoek atas tachta karadja'an soeda kedjadian bebrapa perkara besar. Itoe perkara bisa kedjadian kerna ada laen orang jang djaga pada itoe Radja, sebagimana ini lampoe ada djaga ini peti dan trangken ini kamar. Itoe orang jang sabenernja ada djadi Radja dari kita poenja negri, sedeng ini Radja tjoema ada satoe boneka jang dikasi maen oleh mantrinja. Maski begitoe dalem kita poenja negri tingginja Radja poenja deradjat boekan maen maen, itoe orang jang saoemoer idoepnja bekerdja boeat kebaean negri, jang sengadja bikin koerang kekwasa'annja Radja soepaja kekwasa'an dan pamoernja karadja'an Frans djadi lebi besar, tiada dapet idzin boeat dikoeboer deket ini tempat. Tapi itoe pamerentahan moelia soeda liwat Raoul, itoe mantri jang sanget dibentji oleh Radjanja dan satoe bagian besar dari rahajat negri, soeda meninggal dan adjak djoega Radjanja pergi dari ini doenia, kerna ia kwatir jang itoe Radja nanti bikin roesak ia prenja pakerdja'an, kerna menoeroet pikirannja itoe mantri, satoe Radja tjoema bisa oeroes negrinja dengen sampoernja djikaloe ada Allah atawa satoe melaikat
