— 288 —
„Baek," kata Athos, itoe perkara ada akoe poenja oeroesan."
Raoul tiada dapet liat orangnja bitjara pada Athos. Ia toeroen kebawa tapi sabentar bentar ia menengok boeat pandang pada Athos, sebagi orang jang ingin taoe apa blon temponja ia moesti brangkat, kerna Athos blon kasi tanda boeat itoe perkara.
Di depan pintoe ia dapet liat ada tiga koeda soeda di selaken.
„O, toean," kata Raoul dengen swara girang, kau maoe anter pada akoe."
Dengen matanja bertjahja sebab senang hatinja Raoul lompat naeken koedanja.
Dengen pelahan Athos naek koedanja tapi lebi doeloe ia soeda kasi sedikit prenta pada pengikoetnja, kerna Olivain tiada lantes toeroet naek koeda, tapi ia balik lagi ka dalem hotel. Setaoe lantaran kegirangan atawa ia sengadja tiada maoe liat, roepa roepanja Raoul tiada perdoeliken pada itoe perkara.
Berdoea iaorang djalan di Pont Neuf dan djalan troes sepandjang soengei dan liwat di Grand Chatelet, koetika iaorang sampe ditikoengan Saint Denis, pengikoet jang djalan blakangan baroe sampe menjoesoel.
Di djalanan iaorang tiada bitjara banjak, hingga Raoul soeda dapet rasa jang sigra iaorang moesti berpisa; semalemnja Athos soeda atoer bebrapa perkara boeat kaperloeannja Raoul poenja perdjalanan.
Sasoedanja liwat di pintoe kota Saint Denis Athos tengok koeda jang Raoul toenggang.
„Inget betoel, Raoul," kata Athos: „Akoe soeda bilang ini perkara bebrapa kali kau djangan loepa lagi, kerna ini satoe hal ada
