— 248 —
tapi ia tinggal diam sadja di pembaringannja dan tatkala La Ramee hampirken padanja, ia dapetken hertog keliatan moekanja sanget poetjet dan lesoe, hingga La Ramee djadi menanja apa hertog brangkali ada koerang senang badan.
Satoe soldadoe jang toeroet tidoer dalem itoe kamar tapi tiada bisa poeles lantaran ia ada sakit gigi soeda tjampoer moeloet dan kata :
„Semalem Monseigneur tidoer koerang baek, doea atawa tiga kali Monseigneur soeda bertreak minta toeloeng, akoe kira sedeng lagi mengimpi."
„Kenapa begitoe Monseigneur ? tanja La Ramee.
„0, kau ada di sini, kerbo ?" menjaoet hertog, „itoe semoea lantaran kemaren kau bitjara segala jang tiada kroean, hingga akoe djadi mengimpi jang akoe soeda lari lantaran mana akoe djadi djato dan akoe poenja leher soeda djadi pata.“
La Ramee ketawa besar,
„Kau liat Monseigneur," kata La Ramee, „itoe perkara ada satoe tegoran dari langit dan akoe harep perkara begitoe Monseigneur nanti berboeat dalem impian sadja."
„Apa jang kau bilang ada betoel sekali, La Ramee, kata hertog dengen seka djidatnja, jang maski ia soeda djadi sedar, masi djoega kaloear kringet, „akoe tjoema maoe pikir perkara dahar dan minoem sadja."
„Diam !" kata La Ramee.
Sekalian orang djaga ia prenta kaloear dengen kasi roepa roepa alesan.
„Abis ?" kata hertog koetika iaorang tinggal berdoea.
— „Barang makanan soeda dipesen."
