— 247 —
dari pendjara, tapi di tenga djalan sajapnja soeda djadi roesak dan ia djato di satoe djoerang jang sanget dalem. Koetika ia mendoesin seantero badannja basa dengen kringet.
Tiada lama ia poeles lagi dan dapet laen impian; roepa roepanja baroe sadja matanja djadi merem, hatinja jang tiada brentinja pikirken perkara lari, lantes maoe tjoba lagi itoe perkara. Ini sekali impiannja ada laen. Dalem itoe impian ia dapet taoe jang di bawa tembok pendjara ada satoe djalanan resia, dari mana orang bisa lari kaloear. Ia djalan di itoe lobang dengen Grimaud jang bawa satoe lentera boeat soeloein djalanan, Bermoela itoe djalanan ada sampe loeas tapi semingkin djaoe djadi semingkin ketjil sampe ia tiada bisa liwat lagi; maski ia tjoba begimana djoega ia tiada bisa madjoe lebi djaoe, tapi toch Grimaud bisa djalan troes; ia maoe bertreak boeat minta Grimaud toeloeng padanja tapi ia tiada bisa berswara.
Itoe koetika ia dapet denger swara banjak orang dateng dari tempat bermoela ia djalan dan tiada lama lagi ia liat bebrapa orang dateng kedjer padanja; ia tjoba boeat lolosken dirinja, tapi semingkin ia tjoba boeat lari ia rasa tana dan batoe batoe di itoe djalanan sempit semingkin pidjit padanja. Ia dapet denger swaranja La Ramee jang hampirken padanja dan pegang ia poenja poendak sedeng moekanja tersenjoem, ia di bawa kombali dalem pendjara dan dikasi masoek dalem satoe kamar jang pernanja disebla bawa tana dari itoe pendjara, satoe kamar jang memang dibikin sedia boeat orang orang hoekoeman jang maoe dipaksa biar boleh djadi mati dalem tempat hoekoemannja.
Koetika ia mendoesin lagi soeda djadi siang,
