— 244 —
Monseigneur tiada nanti liat atawa denger padanja dan boleh andeken sadja jang ada bebrapa ratoes mijl djaoenja dari sini.“
„Sobat,“ kata hertog, „apa kau taoe jang akoe soeda dapet doega kau poenja pikiran. Kau tiada pertjaja pada akoe.“
— „Noesa ada hari raja Pinksteren, Monseigneur. Apa kau kwatir itoe Roh jang moeliea nanti dateng di sini boeat toeloeng boekaken pintoe pendjara?
— „Boekan begitoe, Monseigneur, tapi tadi akoe soeda tjeritaken apa jang itoe noedjoem telah ramalken.“
— „Apa jang ia soeda ramalken?“
— „Jang pada waktoe orang rajaken Pinksteren, Monseigneur nanti ada di loear Vincennes.“
— „Kau pertjaja apa jang itoe orang soeda bilang? Kau betoel saorang bodo.“
— „Akoe sendiri tiada pertjaja itoe perkara, tapi Guilio Mazarin ada saorang Italisan dan itoe bangsa sanget pertjaja perkara tachajoel.“
Hertog angkat poendaknja.
„Na, apa boleh boeat,“ kata hertog sebagi orang jang kepaksa trima peroentoengannja, „akoe moesti trima djoega kau poenja voorstel tentang Grimaud, djikaloe tiada, tentoe ini perkara tiada bisa djadi. Tapi akoe tiada soeka ada satoe orang lagi selaennja Grimaud dan sekalian oeroesannja kau jang atoer. Bilang pada itoe toean roema makan jang itoe pastel akoe jang maoe dahar dan djikaloe akoe dapet kenjata'an ia pande dalem ilmoe masak, akoe maoe berdjandji djadi ia poenja langganan boekan selamanja akoe ada di sini sadja, tapi seabisnja akoe kaloear djoega.“
