— 243 —
— „Tapi dengen ampat mata sadja. Sekalian orang djaga kita prenta boeat pergi dahar di tempatnja, sedeng kita berdoea dahar di sini. Kau boleh atoer begimana kau kira baek.“
„Hm!“ kata La Ramee dalem hatinja.
Ini officier politie sanget ingin toeroet dahar, tapi maski Kardinaal tiada begitoe hargaken ia poenja ketjakepan dalem oeroes pakerdja'annja, La Ramee ada saorang jang tjerdik. Ia pikir toean de Beaufort taoe berkata ada poenja ampa poeloe roepa tipoe, apa sekarang ia maoe goenaken tipoenja?
Ia diam berpikir sabentar dan sasoedanja ia inget jang barang makanan ia sendiri jang atoer ia tiada kwatir dalem itoe makanan nanti di tjampoer obat tidoer atawa sala satoe roepa ratjoen, dan boeat tjoba bikin ia minoem sampe poesing, itoe perkara tentoe soesa kedjadian. Itoe koetika ia dapet inget satoe perkara dan, kira tentoe boleh djadi baek.
Dengen sanget kwatir hertog awasin moekanja itoe officier, tapi kamoedian moekanja itoe orang politie djadi trang lagi.
„Begimana?“ menanja hertog „apa boleh?“
— „Boleh, Monseigneur, tapi dengen satoe perdjandjian.“
— Perdjandjian apa?“
— „Grimaud moesti djaga kitaorang bersantab.“
Hatinja hertog djadi sanget girang denger itoe perkata'an, tapi ia masi bsia roba moekanja sebagi orang jang koerang senang denger itoe perkata'an.
„Setan! itoe Grimaud boleh bikin orang poenja perkara senang bebalik djadi kesel.“
„Akoe nanti prenta ia berdiri di blakang Monseigneur, dan kerna ia tiada soeka bitjara,
