— 213 —
Sabenernja djoega Mazarin boekan troesken niatnja boeat dateng pada Sri Ratoe, tapi ia balik di kamarnja, panggil Bernouin dan prenta padanja, soepaja besok pagi kepala politie jang djaga pada toean de Beaufort moesti dateng mengadep padanja dan Bernouin moesti bangoenken padanja, apabila itoe orang politie dateng.
Dengen tiada sekali terdoega, Saint Laurent soeda bitjaraken satoe perkara jang Mazarin soeda lama sanget kwatirken. Dalem tempo lima taon toean de Beaufort ada dalem pendjara, tiada satoe hari liwat Mazarin tiada kwatir, itoe prins satoe tempo nanti bisa lari kaloear dari toetoepannja, kerna Mezarin sanget kwatir, itoe prins nanti bales sakit hati padanja.
Prins de Beaufort ada tjoetjoe dari Radja Hendrik IV, soedara misan dari almarhoem Radja Lodewijk XIII, oemoernja baroe tigapoeloe taon, ada poenja harta besar, gaga serta soeda kesohor namanja lantaran menang prang pada moesoe moesoe negri Frans, disoeka oleh njonja njonja dan dihormat oleh toean toean. Apa tiada patoet itoe prins djadi sakit hati pada Mazarin jang soeda toetoep padanja, saorang jang masi begitoe moeda serta ada tjoekoep sekalian apa jang perloe boeat idoep senang, tjoema lantaran itoe prins tiada satoedjoe Mazarin soeka pada Sri Ratoe? Oleh kerna kwatir pembalasannja, maka Mazarin soeda prenta boeat djaga lebi kras. Tapi keada'annja ada sebagi satoe dongeng dari saorang kikir jang koempoelken banjak oewang, tiada nanti bisa tidoer poeles lantaran senantiasa kwatir oewangnja orang nanti tjoeri. Begitos djoega keada'annja Mazarin dan kapan sadja ia dapet inget itoe perkara, waktoe siang atawa tenga malem ia lantes prenta orang boeat preksa itoe perkara
