— 206 —
kasoesahan, lantes pergi masoek di kamarnja, dari mana ia tiada kaloear sablonnja waktoe dahar tengahari, tapi tjidra pada waktoe pagi soeda diloepaken sama sekali, dan Raoul blon ada napsoe makan.
Pada waktoe abis dahar orang bawa dateng doea soerat boeat Athos jang ia batja dengen sanget teliti. D’Artagnan jang ada doedoek di sebrangnja Athos soeda kenalken toelisannja Aramis, sedeng soerat jang laen roepa roepanja ditoelis oleh saorang prempoean.
„Raoul,“ kata d’Artagnan jang doega, Athos tentoe soeka ditinggal saorang diri, „mari kita maen anggar sabentar, ako ingin liat kau poenja kepandean.“
Raoul lebi doeloe awasin moakanja Athos dan koetika dikasi tanda ia soeka kasi idzin, ini doea orang lantes pergi di satoe kamar, di mana ada sedia roepa roepa pekakas boeat itoe perkara.
Saprapat djem kamoedian Athos djoega dateng di itoe kamar dan menanja;
„Begimana, apa ia soeda paham dalem itoe perkara atawa blon ?“
„Ia soeda sama pandenja sebagi kau, Athos,“ kata d’Artegnan, „dan apabila ia bisa toeroet sabar sebagi kau, kepandeannja haroes dipoedji.“
Raoul sendiri djadi merasa maloe denger itoe poedjian, kerna sedeng ia soeda dapet langgar tangan dan kakinja d’Artagnan doea atawa tiga kali, d’Artagnan soeda kena toesoek padanja di betoelan dada lebi dari doeapoeloe kali.
Itoe koetika Charlot dateng masoek bawa satoe soerat perloe jang sengadja dibawa oleh satoe orang boeat d’Artagnan.
Sekarang ada gilirannja Athos boeat awasin
