— 194 —
saorang diri boeat berpikir apa jang ia soeda liat dan denger di itoe hari.
Lantaran ia dari doeloe, memang soeda soeka pada Athos hatinja telah djadi sanget girang ia ketemoeken sobatnja ada seger dan gaga, boekan sebagimana ia soeda kwatirken; maski begitoe, toch ada satoe perkara jang ia boeat pikiran.
Menoeroet d’Artagnan poenja pikiran, Athos tiada bitjara troes trang padanja. Siapa adenja itoe anak moeda, jang menoeroet Athos poenja ketrangan, satoe anak piatoe jang ia soeda poengoet, tapi moekanja kenapa sama betoel dengen moekanja Athos? Lantaran apa Athos soeda roba pengidoepannja sampe begitoe berbeda, hingga pada waktoe dahar ia tiada maoe minoem anggoer lebi banjak dari satoe glas sadja, sedeng biasanja ia tiada maoe brenti minoem djikaloe ia blon poesing ? Kenapa tiada keliatan Grimaud dan kenapa tiap tiap kali d’Artagnan maoe tanja itoe perkara, Athos lebi doeloe soeda doega kemaoeannja dan toekar perkara jang dibitjaraken djadi laen haloean ? Apa Athos tiada pertjaja lagi padanja? Apa brangkali ia ada teriket pada sala satoe perdjandjian? Atawa orang soeda Kabarken, ia maoe dateng padanja boeat bitjara dari hal Mazarin poenja oeroesan ?
D’Artagnan pikirken itoe perkara dan dapet inget pada Rochefort jang koetika ia ketemoe di gradja Notre Dame ada bitjara dari hal ia maoe pergi djalan djalan di province. Apa Rochefort brangkali soeda dateng lebi doeloe pada Athos?
D'Artagnan pikir, tiada boleh bikin ilang tempo dengen pantjing lebi doeloe; soeda tetep
