— 180 —
poenja moeka poetjet dan kau poenja mata keliatannja bingoeng?“
— „Sebab satoe ketjilaka'an soeda kedjadian pada itoe nona, kita poenja tetangga.“
„Pada jonkvrouw de la Vallière ?“ menanja Athos dengen tjepet.
„Apa soeda kedjadian padanja ?“ bebrapa tetamoe toeroet menanja.
„Dengen ia poenja baboe ia lagi maen maen di atas toempoekan kajoe,“ kata Raoul. „Akoe liwat di sana dan brentiken akoe poenja koeda, Ia djoega soeda dapet liat pada akoe dan lantaran toeroen dengen tjepet dari itoe toempoekan, tapi ia soeda kesleo kakinja dan tiada bisa berdiri.“
„Ja, Allah,“ bertreak Athos, „apa njonja de Saint Remy, iboenja itoe nona, soeda dapet kabar dari ini perkara ?“
„Blon, toean,“ kata Raoul, „njonja de Saint Remy ada di Blois pada hertogin van Orleans. Akoe kwatir orang rawat itoe kaki tiada baek, toean, maka akoe dateng di sini boeat menanja pada toean, apa moesti dibikin.“
„Kau prenta orang pergi di Blois, Raoul ! Atawa lebi baek kau sendiri pergi naek koeda!“ kata Athos.
Raoul manggoet.
„Di mana Louise ada sekarang ?“ Athos menanja.
„Akoe soeda bawa ia ka mari dan sekarang istrinja Charlot lagi djaga padanja,“ kata Raoul.
Ini perkara dianggep sebagi satoe lantaran pantes boeat tetamoe brangkat poelang dan sigra iaorang berpamitan dari Athos, tjoema hertog de Barbé, sebab soeda berkenalan doea poeloe taon lamanja dengen familie de la
