— 179 —
iaorang boleh bikin poetoes apa jang iaorang lagi bitjaraken dan maoe djalan poelang. Sedeng iaorang baroe berbangkit dari masing masing poenja tempat doedoek ada kadengeran swara andjing menggonggong dan itoe tetamoe ampir bebareng berkata:
„O! itoe tentoe Raoul jang baroe poelang.“
Koetika namanja Raoul diseboet, Athos awasin moekanja d'Artagnan sebagi ia maoe liat, apa d'Artagnan tiada ingin dapet taoe, siapa adanja itoe Raoul. Tapi itoe koetika d'Artagnan poenja moeka tiada beroba sama sekali, kerna ia blon dapet taoe, siapa adanja itoe Raoul. D'Artagnan tjoema toeroet menengok ka djoeroesan pintoe loear dan itoe koetika ia dapet liat satoe anak moeda oemoer limablas taon, dandanannja tjakep, pakeannja saderhana, tapi rapi, dateng masoek kasi hormat pada sekalian tetamoe dengen pegang topinja di tangan.
Itoe koetika baroe d'artagnan djadi kaget. Ia djadi sedar kombali dari bengongnja lantaran berpikir, lantaran apa ia soeda doega sala Athos poenja keada'an. Itoe anak moeda roepanja sama sekali sebagi Athos, djadi lantaran ada itoe anak Athos poenja adat dan pengidoepan soeda beroba djadi begitoe baek bagi dirinja. D'Artagnan tinggal diam sadja, kerna ia lebi doeloe maoe liat dan pasang koepingnja boeat dapet taoe, siapa adanja itoe anak moeda.
„Kau soeda kombali, Raoul ?“ kata graaf de la Fere.
„Ja, toean, itoe anak moeda menjaoet dengen hormat, akoe soeda djalanken toean poenja prenta.“
— „Ada apa perkara, Raoul, akoe liat kau
