— 181 —
Valliere, dengen tiada oesa pake atoeran lagi itoe hertog lantes pergi tjari nona Louise. Itoe nona lagi menangis, tapi koetika ia dapet liat Raoul, ia brenti menangis dan djadi ketawa.
Hertog Barbé kasi voorstel, soepaja itoe nona toeroet doedoek kreta pergi di Blois.
„Itoe betoel, toean,“ kata Athos, „dengen begitoe ia lebi tjepet sampe pada iboenja. Raoul, akoe kira kau soeda djadi lantaran dari ini perkara.“
„O ! tiada, tiada, toean, akoe brani bilang, betoel boekan ia poenja lantaran,“ kata nona Louise, sedeng Raoul telah djadi poetjet moekanja lantaran baroe inget, brangkali nona Louise soeda djato lantaran maoe boeroe padanja.
„O ! toean,....“ kata Raoul sebagi orang kemekmek.
„Maski begitoe kau moesti toeroet djoega ka Blois boeat ketemoeken pada njonja de Saint Remy,“ kata Athos dengen swara manis, „dan minta, soepaja ia tiada djadi goesar pada akoe, sebab akoe tiada pergi anter nona Louise padanja.“
Moekanja itoe anak moeda djadi trang lagi; ia awasin moekanja Athos sabentar, kamoedian ia pondong itoe nona jang lantes senderken kapalanja di poendaknja Raoul dan dengen plahan itoe nona dikasi doedoek di dalem kreta. Kamoedian Raoul dengen tjepet naek koedanja jang ia kasi lari di pinggir kreta, sedeng matanja tiada brentinja awasin djendela kreta.
— — — —
XVI.
D'Artagnan soeda awasin sekalian itoe perkara dengen tiada berkata satoe apa. Ia soeda dapetken Athos dengen keada'annja sanget berbeda dengen
