— 178 —
hampirken bebrapa tindak dan pelok sobatnja. D'Artagnan koetika soeda ilang kagetnja lantes bales pelok sobatnja, sedeng ia poenja mata keliatan ada mengembeng aer lantaran keliwat girang, apa jang ia soeda kwatirken sama sekali tiada ada.
Athos pegang tangan sobatnja dan adjak ia masoek ka dalem, di mana ada keliatan bebrapa toean toean. Itoe toean toean lantes berbangkit dari iaorang poenja tempat dan Athos berkata:
„Akoe kasi voorstel pada kau orang toean ridder d'Artagnan, luitenant dari barisan musketier balatentara Radja, satoe sobat jang setia dan saorang bangsawan gaga, jang akoe blon ada kenal saingannja.“
Menoeroet atoeran masing masing tetamoenja Athos kasi hormat pada d'Artagnan jang bales djoega hormat, kamoedian ia doedoek dan bitjara'an jang baroesan dibikin poetoes lantaran ia poenja dateng, dimoelain lagi.
Sedeng orang lagi bitjara, d'Artagnan awasin Athos.
Soenggoe ane Athos poenja moeka tiada sekali lebi toea keliatannja, sedeng pinggir matanja, di mana doeloe ada keliatan biroe lantaran ia banjak begadang, soeda ilang, hingga matanja djadi keliatan lebi tjeli dan moekanja banjak lebi seger, pendeknja Athos keliatannja ada sebagi satoe anak moeda jang baroe beroemoer tigapoeloe taon sadja.
Toean toean tetamoenja Athos soeda dapet doega, ini doea sobat lantaran iaorang soeda lama tiada ketemoe satoe pada laen, tentoe ingin tinggal berdoea boeat tjeritaken satoe sama laen poenja keada'an, maka masing masing berpikir boeat tjari djalan, begimana dengen pantes
