— 175 —
toendoeken kepalanja sebagi orang jang lagi mengimpi.
Planchet djoega legi berpikir, tapi apa jang ia pikir ada sanget berbeda. Planchet soeda bitjara dan liat tingka lakoenja itoe toekang grobak, itoe orang soeda bitjara ia poenja bahasa dengen teges sekali, brangkali di kota Parijs sendiri tiada ada rahajat negri bisa bitjara begitoe aloes dan teges swaranja, djikaloe ia tiada dapet pladjaran dalem sekola tinggi, sedeng tingka lakoenja itoe orang djoega tiada sama sebagi satoe orang doesoen jang biasa bekerdja berat. Planchet doega, itoe orang tentoe ada satoe fronde jang sebagi ia kepaksa boeat menjaroe dan semboeni di satoe tempat soenji.
Sebagimana itoe toekang grobak soeda bilang, di betoelan tikoengan iaorang dapet liat astana la Valliere dan koetika iaorang soeda liwatken itoe astana, di hadepan iaorang kira kira stenga mijl djaoenja keliatan di atas boekit satoe roema temboknja poeti, sedeng sapoeternja ada banjak poehoen poehoen lagi berkembang.
Semingkin deket iaorang sampe di itoe tempat hatinja d'Artagnan djadi semingkin kesel dan moekanja soeda djadi poetjet, hingga Planchet sabentar bentar awasin moeka toeannja,
Tiada lama poela iaorang sampe di depan satoe pintoe hek besi, dari mana iaorang bisa liat kebon kebon kembang jang ada dalem pekarangan itoe astana ada dirawat baek, sedeng di samping itoe roema ada keliatan bebrapa koeda toenggang lagi dipegang tomnja dan satoe kreta dengen koeda koeda ada menoenggoe djoega di depan itoe astana.
